अशोकसँग मायामा परेकी छु

- सुव्रत आचार्य

असार १२, २०७३

तपाईं आफूलाई के भनेर परिचय दिनुहुन्छ ?

‘ब्युटी लेडी विद् ब्रेन’ भन्दा घमन्डी भइछे भन्ने आरोप लाग्ला । बरु यसरी भनौं, एउटी कलाकार जो आफ्नो अनुभव लेख्ने प्रयास गरिरहेकी छिन् । 

अनि चपली गर्ल ?

यो ‘चपली हाइट’की नायिका भएपछिको परिचय हो, अहिले पनि मलाई धेरैले त्यही भन्छन् । परिचयको दायरा बढेको छ, अब ‘जुइनो लेडी’ पनि । 

चपली हाइटको सिक्वेलमा अटाउनु भएनछ नि ?

म अमेरिकामा थिएँ । यहाँ भएकी भए पनि अटाउन्नथेँ, किनभने निर्माण पक्षसँग मेरो सम्बन्ध राम्रो छैन । 

किन त्यस्तो भयो ?

यति बुझ्नुस् कि ‘अन्डरस्ट्यान्डिङ’ राम्रो भएन । 

चपली हाइटपछिका तपाईंका चलचित्रलाई दर्शकले झुर भने त ?

म कुनै पनि चलचित्रमा त्यो ‘झुर’ हुन्छ भनेर काम गर्दिनँ र म आफ्ना चलचित्रलाई ‘झुर’ पनि मान्दिनँ । 

अमेरिकामा के गर्दै हुनुहुन्छ ?

एटलान्टामा एमबीए गर्दैछु । एक वर्ष बाँकी छ । 

अनि यहाँको अर्गानिक कृषि खेती ?

साथीहरूले चलाएका छन् । पढाइ सकेर फर्किएपछि फेरि सक्रिय हुन्छु । 

अहिले किन आउनुभएको ?

मैले लेखेको उपन्यास ‘जुइनो’ बजारमा ल्याउन फाइन प्रिन्टका अजित बरालले बोलाउनुभयो, त्यसैले । 

लेखिका हुने जाँगर र प्रतिभा कहाँबाट आयो ?

सानैदेखि चलचित्र नायिका बन्ने रहर थियो । मभित्र लेखिका पनि रै’छिन् । अहिले उनी फुत्त बाहिर आइन् । 

अनि अभिनय ?

कुनै–कुनै कुरा लेखेर मात्र अभिव्यक्त गर्न सकिन्छ, त्यसैले ‘जुइनो’ लेखेँ । अभिनय गरेर अभिव्यक्त गर्ने बेलामा अभिनय गर्छु । 

चलचित्रबाट प्रस्ताव आएका छैनन् ?

म उता (अमेरिका) छु । फर्किएपछि काम गर्छु चलचित्रमा । 

मोडल, नायिका, कृषक अब लेखिका विवाह गर्ने फुर्सदचाहिँ कहिले जुर्छ ?

भर्खर त जीवनको ‘सिल्भर जुब्ली’ सकेँ । पख्नुस् न, दुई वर्षपछि गर्छु । 

प्रेम त परेको होला नि ?

अशोकसँग मायामा परेकी छु । अशोक अर्थात् ‘जुइनो’को केन्द्रीय पात्र । 

प्रकाशित :असार १२, २०७३